كشفت أسرة الغطاس محمد نبيل، المتوفى غرقًا في العين السخنة خلال تأدية مهام عمله، تفاصيل وفاته، التي كانت نتيجة إهمال شركة O2 Diving للغطس، في صيانة وتصليح معدات الغطس واستخدام أكسجين ملوث.

وقال سعيد جابر، ابن خالة الغطاس محمد نبيل، في تصريحات لـ القاهرة 24، إن الشركة طلبت منه عمل وهو معهم منذ 3 أيام، مضيفا: محمد ابن خالتي هو الابن الكبير ووالده متوفى من زمان، وهو غطاس في شركة O2 Diving للغطس.

وأضاف: محمد شغال في الشركة من 5 شهور بشكل دوري ومتأمن عليه، ومهمة عمله تحت الماء بتستغرق من نص ساعة لساعة إلا ربع، ومينفعش يطول تحت الماء أكتر من كده، وقبل ما ينزل المياه كان مكلم والدته، ومعرفها إنه راجع البيت بعد الشغل.

وتابع: الشركة كانت بتحاول تسكتنا وأول ما وصلنا لـ الميناء في العين السخنة قالولنا ايه اللي جابكم دلوقتي كنتوا خليكوا للصبح، ولما سألنا الشركة قالوا إنهم نزلوا الغواصين أول غطسة يبحثوا عن محمد، وفضلوا يقولوا لنا لسه استنوا لحد ما النهار يطلع عشان الليل دخل علينا، حتى في الوفاة واستخراج الجثة كان في إهمال.

واستكمل: كل اللي بنطلبه هو حق محمد نبيل وحسن عدلي، لأن الشركة دي تسببت في الإهمال اللي أدى لوفاتهما، ودي واقعة متكررة لنفس الشركة، وفي عام 2016 حصل نفس الواقعة، واتكررت في عام 2019، ولكن المرادي تكررت مع حسن عدلي ومحمد نبيل، شابين عمرهم صغير مكملوش الـ 30 سنة.